Менің Отаным — Қазақстан

Отан сөзінің құдіреттілігі де сонда. «Бұл дүниеде біздің бір ғана Отанымыз бар, ол — тәуелсіз Қазақстан» деп Елбасымыздың өзі өте үлкен тебіреніспен айтқан.

Отан десе менің көз алдыма Алтай мен Атыраудың арасын алып жатқан ұлан-байтақ қазақ даласы елестейді. Сол далада қазақы жылқының құлағынан ұстап шауып келе жатқандай болам. Кеудем толқып, жүрегім үлкен тебіреніске түседі. Өзімді бақытты ұрпақ қатарына жатқызам. Себебі, менің Отаным – Тәуелсіз Қазақстан. Иә, осы құдіретті сөздің соңында қаншама қазақтың ұлы құрбан болды. Қаншама қазақ анасы көз жасын төкті. Кешегі өткен бабаларымыз ақ найзаның ұшымен, ақ білектің күшімен қорғап бізге аманаттап кеткен кең байтақ далам бар. Ал бұл дала қойнауы қазақ баласының бақытына жазылған құтты мекен.Өз Отанымның кез-келген жетістігімен, кез-келген сұлулығымен мақтана алатыныма қуанамын.

Қазақстан дүниежүзі бойынша жер көлемі жөнінен тоғызыншы орында тұр. Осыншама сайын даланы қорғағанда, біз далада қалмасын, кейбір ұлт өкілдеріндей қазақтың жер бетінен жойылып кетпеу үшін қаншама ерен еңбек жасады бабаларымыз. Дүниежүзінде 250-ге жуық ел бар. Бірақ, олардың барлығы дерлік тәуелсіздікке қол жеткізген емес. Олардың арасында автономиялық мемлекеттер бар, тіпті автономия ала алмай жүргендері қаншама? Олардың жанында біз өте бақытты ұлтпыз.

Өз үйіңде отырып ұлың мен қызыңа, болашақ ұрпағыңа «Мынау сенің Отаның, туған мекенің, сенің ата-бабаң өсіп-өнген, жанын салып қорғап, сенің бақытың үшін аянбай тер төгіп кеткен жер. Бұл мекеннің қадірін біл, қасиетін қастерле. Әр тасын ұлықта!» деп айта алатын болғандығымыздың өзі қандай құдіретті бақыт.

Осынау байтақ далада қазақтай ұлы халықпен бірге 150-ге жуық өзге ұлт өкілдері ұйысып, бір көк тудың астында бейбіт өмір кешіп келеді. Ол ұлттар мен ұлыстар қазақ халқының кең пейілділігімен, кеңдігін, елдігін құрмет тұтады. Ұлт аралық татулық пен саяси тұрақтылығымызға көптеген елдер қызыға да, қызғана қарайтыны жасырын емес. Бір-біріміздің жағамыздан жыртпай, ізеттілік пен ибалылықтан аттамай бірліктің аясында сыйысып келеміз.

Кең байтақ даламда қаншама құнды дүниелер, тарихпен астасқан қаншама жәдігерлер бар. Менің Отаным бұрынғы өткен Қорқыт бабам жерұйығын тапқан жер, кешегі Керей мен Жәнібек керегесін қағып, уығын байлаған жер! Бүгінгі Елбасы Нұрсұлтан Тәуелсіздігін сайлаған ұлы мекен!

Қойнауында химиялық элементтердің жүз пайызы дерлік кездесетін ұлы дала бұл. Қара алтынымен әлемді аузына қаратқан жер. Елнамысын қорғаған Бекзаттардай талай саңлақ көк байрағын бүкіл әлемге желбіреткен мемлекет бұл.

Өзінің төл тарихын тасқа жазған саналы ұлттың ұрпағымыз біз. Көк байрағы бар, әнұранымен айбат шеге алатын, елдігін меңзеп тұрар елтаңбасы бар қазақпыз. Төл теңгесі бар, аспанмен жер тіреген Астанасы бар елміз.

Тәуелсіздігін алып, тұрақтылығына талайды тамсандыру жолында Біріккен ұлттар ұйымына, Тәуелсіз мемлекеттер достастығы сынды көптеген халықарарлық ұйымдарға мүше бола білдік.
Кең байтақ даламызда небір керемет те сұлу мекендер бар. Арқа төсіндегі Астана қаласының жаңа ғасыр қаласы атанғаны жасырын емес. Ару қала Алматының сұлулығын сөзбен айтып жеткізу қиын. Оның Алатау баурайында орласқандығының өзі қаншалықты кереметтілігін білдірсе керек. Тарихы тереңде жатқан кешегі Ақсақ Темірлер өткен Түркістанның рухани Астана атануының өзі бекер емес. Сонау Қызылорда төсіндегі Байқоңыр ғарыш айлағында қазақтың ұландары ғарышқа сапар шекті. Мұның өзі қандай тарихи керем сәт десеңізші. Мойынқұм шөлі мен, Зайсан, Балқаш, Алакөл, Қайыңды көлдері табиғаттың берген сыйы дерсің. Кербез сұлу Көкшенің сымбатты табиғатын талай ақын өлеңмен жеткізе алмай кеткені де жасырын емес.

Бүгінде бұл ұлы мекен бақыт мекеніне айналып отыр. Олай дейтінім әр адамның арман-тілегі, қалауы орындалып, білім алып, өсіп-өніп өркендеуіне жағдай жасалған арайлы мекен. Осы кезге жету жолында талай тарихи зобалаң шақты бастан кешірсе де мойымаған айбынды ел.

Мәдени өмірі өзінше қайнап жатыр. Қаншама мәдени ошақтар жұмыс жасап, рухани демалуға, жандүниеңе қуат алуға қызмет етуде. Экономикасы қарқынды дамып келеді. Осындай қуатты ел мақтануға тұрарлық Ұлы Отан.

Менің жүрегімнің түкпірінде сан қырымен сақталған Отанымның кереметтілігін, құдіреттілігін жаза берсең таусылмайтыны шындық. Ұлтым деп еміреніп тұрған перзенттері барда әлі де биіктерден көрінетінін нық сеніммен айта аламын. Себебі, бұл дала қазақтай ұлы халық мекен етіп, тағдырын таласқа салып ел болған жер. Бүгінде әлеммен бірге алға жылжып, дамып, өсіп өркендеп келе жатқан бұл менің Отаным – Қазақстаным.

Мақала авторы: Нұрсұлу Базарбай