Би құдіреті

Әлемнің тірегі де, тілекшісі де бола білетін, батырды да, ақынды да, патшаны да өмірге әкелетін ана екені бәрімізге аян.Ана деген үш-ақ әріптен тұратын сөздің құдіреттілігін сөзбен айтып жеткізу мүмкін емес.
Осы сөздің бір дәлеліндей болып, біздің Астана қаласындағы №47 «Ақ желкен» балабақшасында «Ана-біздің күніміз, ана біздің гүліміз» атты ертеңгіліктер өткізілді.Ертеңгіліктер өте жоғары деңгейде өтті.Әрине бұндай іс-шараларды өткізу үлкен еңбек пен ізденімпаздықты талап ететіні сөзсіз.Соның ішінде балабақша бишісі Айгүл Болатқызының ерен еңбегін айтпай кетуге болмайды.Әр топтың ертеңгілігінде бір жаңа би көріп, таң-тамаша болып отырдық.
Сол кереметке ерекше бір серпін беріп, селт еткізген «Ақ қайың» ортаңғы тобының әкелері мен қыздары билеген биі болды.Әкесінің қызына деген шексіз махаббаты мен мейірімділігі көрініс тапқан үздік туынды жиналғандардың жанарына жас үйірлітті.Көрерменнің жүрек түкпіріндегі сезімін қозғап, тіпті топ тәрбиешілері біздің де алыстағы ата-анамызды есімізге салды.

Ертеңгілік бітіп, фотоға түсу басталды.Бір кезде менің жаныма таянған жас келіншек:
-Апай, сіздердің жаңағы билеріңіз менің маңызды шешім қабылдауыма себеп болды, -деді жымиып.
Мен түсінбей аңтарыла қарап қалыппын.Ол болса, асықпай әңгімесін ары қарай жалғады.
-Менің екі балам бар,- деп бастады ол әңгімесін.Жолдасым екеуміз жараспай, ажырасуға бел буған едік.Енді мына биді көріп, ойым өзгерді.Не үшін менің балаларым әке мейірімі мен махаббатын көрмей өсуі керек.Мен ажыраспаймын,-деп бұрылды да, нық басып бірінші қабатқа түсіп кетті.Мен де іштей бақыт тілеп қала бердім.
Тілегім:балапандарымыз әкесі мен анасының ортасында толыққанды отбасында өссе екен.Шіркін, өнердің құдіреті ай…

Авторы: Акжигитова Гулнур